Келіншек өзіне тиіскен ер адамды балағаттағаны үшін жауапқа тартылды

Душанбеде 25 жастағы блогер әйел Манижа Назарова көшеде өзін қорлаған ер адамға тіл тигізгені үшін 420 сомони (37,2 доллар) айыппұл төледі.

«Настоящее время» басылымының хабарлауынша, Назарова жолдан өтіп бара жатқанда белгісіз жас жігіт оның қолынан ұстап алған.

«Мен «не істеп жатырсың» десем, аузына келгенін айта бастады. Мен барлығын жазып алып, өзім де ашу үстінде біраз заттар айттым. Ішкі істер министрлігі менің сөзімді қорлау деп тауып, айыппұл салып, фотомды өз сайтында жариялады» деді Манижа Назарова.

Полицейлер келіншекке тиіскен ер адамды ұстап, ұсақ бұзақылық жасағаны үшін бес күнге қамауға алды. Сондай-ақ, Манижаның сөздерін қорлық деп танып, оған айыппұл салып, блогердің суретін өздерінің сайттарында жариялаған.

Назарова сайтта оның суретін жариялағаны үшін Душанбе Ішкі істер министрлігін сотқа бермек. Оның айтуынша, бұл оның ар-намысына, абыройына және жеке өміріне соққы болған.

«Бір айдан кейін тойым болу керек еді. Күйеуімнің бүкіл отбасы осы жазбаның астынан менің фотомды көрді. Полиция сайтында сіздің фотосуретіңізді көргенде, қаласын-қаламасын кез келген адам сізді қылмыс жасады деп ойлайды. Көбісі ақпаратты соңына дейін оқымайды, сіздің суретіңізді көреді, соның өзі жеткілікті. Енді тойым болмайтын болды» деді Манижа Назарова.