ҚазҰУ «студенттерінің пәктігі» туралы тізім: университет басшылығы журналистерді кіргізбеу туралы тапсырма берген

ҚазҰУ-дағы механика-математика факультетінің өкілдері  басшылыққа сілтеп, журналистерге ақпарат беруден ат тонын ала қашты, деп хабарлайды Orda.kz порталы Masa Media порталына сілтеме жасап.

Күзетші басшылықтан «ішке журналистерді кіргізбеу» туралы нұсқау түскенін айтты. 

Тегін айтудан бас тартқан Нартай есімді ректорат күзетшісі университеттің баспасөз қызметінің өкілі Алмат Исәділдің шықпайтынын мәлімдеді. Исәділ оған телефон арқылы журналистер сұрағына Жастар ісі бойынша департамент басшысы Жұлдыз Дәпенова жауап беретінін жеткізген.

Журналистің «Дәпеновамен қалай байланысуға болады?»  деген сұрағына күзетші оның ұялы телефоны жоқ екенін, жұмыс телефонын ешкім көтермейтінін айтты. Біраз уақыттан кейін «Жұлдыз Дәпенова қазір өзге БАҚ өкілдеріне сұхбат беріп жатыр, қашан келетіні белгісіз»,- деді. 

Факультет студенттерінің кейбірі тізімді көрмегенін, ондай жаңалықтан бейхабар екенін айтса, кейбірі тізімді өз көзімен көріп, таң қалғанын жеткізді. Алайда барлығы чатта студенттердің флюрографиядан өту туралы тізім тарағанын растады.

«Тізімді көріп, таң қалдым. Бізді осыған байланысты деканатқа шақырып, ешқандай жиын өткізген жоқ. Мүмкін қыздарды шақырған шығар. Ол жерде негізінен қыздардың аттары ғой», – деді факультет студенттерінің бірі. 

Еске салайық, 13 ақпанда әл-Фараби атындағы Қазақ Ұлттық Университетіндегі старосталар чатына 200-ге жуық студенттің жеке дерегі жазылған құжат жіберілгені жөнінде ақпарат тараған. Онда студенттердің аты-жөні, жеке сәйкестендіру нөмірі, телефон нөмірлерінен басқа гинекологиялық деректері, оның ішінде студенттердің пәктігі жөнінде мәлімет те болған.