«Қазспецэкспорт» РМК шенеуніктері миллиард теңге ұрлады деген күдікке ілінді

Қаржы мониторингі агенттігі «Қазпецэкспорт» кәсіпорнының лауазымды тұлғалары мен олар бақылайтын заңды тұлғалар басшыларының ұсталғанын хабарлады, деп хабарлайды Orda.kz.

Олар әскери және әскери-техникалық тауарларды сатып алу кезінде бір миллиард теңгеге жуық бюджет қаражатын ұрлады деген күдікке ілінді.

«Лауазымды тұлғалар Бас әскери прокуратураның келісімімен ұсталды. Олар мемлекеттік қорғаныс тапсырмаларын орындау аясында бағаны жоғарылату арқылы ұрлық жасаған. Сотқа дейінгі тергеу басталды» деп хабарлады ҚМА.

«Қазспецэкспорт» РМК Қазақстан Республикасының Қарулы Күштерін, басқа да әскерлері мен әскери құралымдарын қамтамасыз ету мақсатында үкімет қаулысымен құрылған және қару-жарақ пен әскери техниканы, сондай-ақ әскери мүлікті әкелу және әкету салаларында жұмыс істейді.

Компания сайтында көрсетілгендей, оны Арман Рамазанов басқарады. Бас директордың орынбасарлары ретінде Аршат Аяғанов пен Сәтім Тастайбеков көрсетілген.