«ҚазмұнайГаз» ресей хакерлерінің шабуылы жайлы деректі жоққа шығарды

«ҚазМұнайГаз» ұлттық компаниясы шетелдік БАҚ-та жарияланған, ресейлік хакерлер ҚМГ компаниясының цифрлық инфрақұрылымына шабуыл жасады деген ақпаратқа қатысты түсініктеме берді, деп хабарлайды Orda.kz.

«ҚазМұнайГаздың» баспасөз қызметінің Orda.kz сайтына берген жауабында, шетелдік басылымдар жоспарлы қауіпсіздік тексерісін кибершабуыл деп санағанын хабарлады. Олардың нұсқасы бойынша бұл жай тексеріс.

«2025 жылдың мамыр айында ҚМГ ақпараттық қауіпсіздік мәселелері бойынша қызметкерлердің хабардарлығын тексеру, бағалау және арттыру мақсатында жоспарлы ішкі іс-шара өткізді. Әсіресе, Ақпараттық қауіпсіздік операциялық орталығы мен ҚМГ Ақпараттық қауіпсіздікті жедел басқару орталығы тарапынан қатерлерге жедел әрі дұрыс әрекет ету дағдыларын саралауға баса мән берілді», – деп мәлімдеді ұлттық компания.

ҚМГ дерегінше, бұл «оқу-жаттығу» түріндегі хакерлік шабуылдың үлгісі болған. Ол компания ішінде ресми түрде мақұлданып, қызметкерлердің нақты қатерлерге дайындығын бағалау үшін өткізілген.

«Оқу-жаттығу шарасы туралы жауапты тұлғалар мен мүдделі тараптар алдын ала білді. Шара қорытындыларына жасалған кешенді бағалау негізінде ҚМГ тобының бөлімшелеріне ақпараттық қауіпсіздікті одан әрі күшейтуге бағытталған нақты ұсыныстар жолданды», – деп жазды компания Orda.kz-ке жолдаған жауабында. 

ҚМГ ақпараттық қауіпсіздік жүйесін нығайту жұмыстарын жалғастыра беретінін мәлімдеді.

Бұған дейін бірнеше шетелдік салалық сайттар ҚМГ-нің цифрлық инфрақұрылымына мамыр айында хакерлер шабуыл жасағаны жөнінде ақпарат жариялаған болатын. Шетелдік БАҚ бұл шабуылды ресейлік Noisy Bear атты топ ұйымдастырды деп көрсеткен.