«ҚазМұнайГаз» қазақстандық мұнай өңдеу зауыттарын жекешелендіру туралы ақпаратты жоққа шығарды

«ҚазМұнайГаз» ҰК» АҚ басқарма төрағасының орынбасары Дмитрий Макеев қазақстандық екі мұнай өңдеу зауытын жекешелендіру жоспарланған деген ақпаратты жоққа шығарды.

«Әлеуметтік желілерде және кейбір БАҚ-та Атырау және Павлодар мұнай-химия зауыттарын жекешелендіру жоспарланып отыр деген ақпарат тарады. Бұл ақпараттың шындыққа жанаспайтынын ресми түрде мәлімдегім келеді. Мұндай келіссөздер жүргізілген жоқ. ҚМГ мұнай өңдеу зауытындағы өндірістік процестер қалыпты режимде жүріп жатыр»,- деді ол.

Еске салайық, кейбір БАҚ алдағы екі жылда екі мұнай өңдеу зауытын жекешелендіру туралы шешім қазіргі уақытта мемлекеттік органдарда келісу рәсімінен өтіп жатқан «Экономиканы ырықтандыру шаралары туралы» президент жарлығының жобасында қамтылғанын хабарлаған болатын.