«ҚазМұнайГаз» Қарашығанақтағы үлесті арттырмақ: ұлттық компания «Лукойл» үлесін сатып алуы мүмкін

«ҚазМұнайГаз» ұлттық компаниясы «Лукойлдың» Қарашығанақ мұнай-газ кен орнындағы 13,5 пайыздық үлесін сатып алу мүмкіндігін қарастырып жатыр, деп хабарлайды Orda.kz.

Ресейлік компания иелігіндегі бұл үлестің шамамен құны 1 миллиард доллар болуы мүмкін.

Ашық деректерге қарағанда, «Лукойл Оверсиз Қарашығанақ» — «Лукойлдың» осы жобадағы еншілес компаниясы. 2025 жылдың 1 қаңтарына қарай оның таза активтері 1,05 миллиард доллар, ал 2024 жылғы таза табысы 187 миллион доллар болған. 2023 жылы бұл көрсеткіш 202 миллион доллар болған.

Қарашығанақ жобасына қазір Shell, Eni, Chevron, «ҚазМұнайГаз» және Лукойл компаниялары қатысады. Егер келісім жүзеге асса, ұлттық компанияның жобадағы үлесі едәуір артуы мүмкін.

Еске сала кетсек, бұған дейін халықаралық мұнай трейдингі компаниясы Gunvor Group Ltd «Лукойлдың» шетелдік активтерін сатып алу туралы ұсынысын кері қайтарып алды. Бұл шешім АҚШ Қаржы министрлігі компанияны Ресей билігімен байланысты деп танып, оған бизнес жүргізуге лицензия беруден бас тартқаннан кейін бір сағат өтпей қабылданды.