«Қазфосфат» артық төлеп отырған 1,9 млрд қаржысын қайтарып алды

Жамбыл облысында прокурорлар өңірдегі ірі инвестор — «Қазфосфат» ЖШС-нің құқығын қорғап, кәсіпорынға 1,9 миллиард теңге көлемінде артық төленген салық сомасын қайтарып беруге қол жеткізді деп хабарлайды Orda.kz.

Жамбыл облысының прокуратурасының мәліметінше, бұл қаражат Тараз қаласында бекітілмеген тарифтік реттеу салдарынан қоршаған ортаға эмиссиялар үшін артық төлеп отырған.

«Тараз қаласында мөлшерлеме бекітілмей, серіктестіктен 2022 жылдың 1 қаңтары мен 2023 жылдың 9 ақпаны аралығында төлемдер тұрақты түрде алынып отырған. Кейін анықталғандай, төлемдер нормадан асып, кәсіпорын 1,9 млрд теңгені артық төлеген», — деп мәлімдеді Жамбыл облысы прокуратурасының баспасөз қызметі.

Қазір прокуратураның араласуымен 1,9 миллиард теңге көлеміндегі қаражат компанияның болашақ салық міндеттемелерінің есебіне қайтарылды. Кінәлі лауазымды тұлғалар тәртіптік жауапкершілікке тартылды.

Бұдан басқа, облыс бойынша осындай артық төлемдерге ұшыраған 45 кәсіпкер анықталып, артық төленген салық сомасы 3 миллиард теңгеден асты.