«Қазатомөнеркәсіп» кенішінде күкірт қышқылының төгілгені расталды

«Қазатомөнеркәсіптің» еншілес кәсіпорны «Заречное» БК» АҚ басшылығы оның кенішінде топырақтың күкірт қышқылымен ластанғанын мойындады. Бұған дейін әлеуметтік желіде кәсіпорын маңында түсірілген қорқынышты видеолар пайда болды, деп хабарлайды Orda.kz.

Біздің өтінішімізге жауап ретінде «Заречный» басшылығы атышулы бейнероликте көрсетілген жерлерден ешқандай заң бұзушылық табылмағанын атап өтті. Дегенмен олар  басқа аймақта күкірт қышқылының топыраққа төгілгенін тіркеді. Тексеру қорытындысы бойынша Түркістан облысының экология департаменті кәсіпорынға 1,8 миллион теңгеден астам айыппұл салды.

Компания қышқыл төгілген аумақты қоршап, ол жерден ластанған топырақты алып тастағандарына сендірді. Алаң қалпына келтіріліп, одан кейін шахта бұл жұмыстың нәтижесі туралы табиғатты қорғау басқармасына есеп беруі тиіс.

Тексеру барысында жауапты қызметкерлердің күкірт қышқылы төгілгені туралы бірден хабарламағаны анықталыпты. Сондықтан бұл оқиғаға дер кезінде шұғыл шешім қабылданбаған.

Шахта басшылығы жұртты шулатқан видео әлеуметтік желіде пайда болғаннан кейін кәсіпорынға полиция мен әкімдік қызметкерлері және жазбаны өз парақшасында жариялаған блогер келгенін хабарлады. Оларға өндіріс орындары көрсетіліп, төтенше жағдай кезінде қалай әрекет ету керектігі айтылған.

«Уран шикізаты өндірісінің барлық қалдықтары түр бойынша бөлінеді және ережелерге сәйкес арнайы бөлінген алаңдарға немесе қоймаларға уақытша орналастырылады. Бұл қоршаған ортаға ықтимал әсерді азайтады. Техникалық ақауға байланысты күкірт қышқылының төгілуі сияқты оқиғалар болған жағдайда жедел шара қабылданады»,  деп хабарлады «СП Заречное» АҚ баспасөз қызметі. 

Қышқылмен ластанған топырақ залалсыздандырылып, зертханада тексеріліп, кейін кері қайтарылады. Мұндай жағдайда негізгі қауіп - улы заттың топырақтың терең қабатына енуі. Бірақ олардың айтуынша, күкірт қышқылының химиялық қасиеттері жерді «қыздырады», сондықтан ол терең енбейді. Қышқыл жер асты суларына да жете алмады - Заречное кен орны аймағында жер асты сулары 10-30 метр тереңдікте орналасқан.

«Заречное кен орнын игеру кезіндегі жер асты сулары мен атмосфералық ауаны зерттеу хаттамалары нәтижелері бойынша күкірт қышқылының қоршаған ортаға теріс әсері анықталған жоқ», - деп атап өтті кеніш өкілдері.

Соған қарамастан, оқиғаның барлық мән-жайын зерделеу үшін арнайы комиссия құрылып, қызметтік тергеу жүргізіп жатыр. Ол әлі аяқталған жоқ. Компания әлеуметтік желілердегі бейнелерді де зерттеп жатыр. Олардың жинаған мәліметтері бойынша пайда болған видеоның шамамен бір жыл ішінде түсірілген әртүрлі түсірілімдерден құрастырылғаны белгілі болыпты.