«Қазатомөнеркәсіп» 8 мың тонна уран сатты

«Қазатомөнеркәсіп» ұлттық компания басшысы Мейіржан Юсупов президент Қасым-Жомарт Тоқаевқа жарты жылдағы жұмысы туралы баяндады.

Бұл туралы Ақорда хабарлады.

Мейіржан Юсуповтың айтуынша, «Қазатомөнеркәсіп» жыл басынан бері 11 мың тонна уран өндірген, оның ішінде сату көлемі 8 мың тонна болды.
 
Сонымен қатар, Юсупов елдегі минералдық-шикізат базасын кеңейту және толықтыру жобалары мен ұлттық компанияның геологиялық барлау активтері қоржынын одан әрі кеңейту туралы айтты.
 

«Қазатомөнеркәсіп жыл басынан бері өңірлердің әлеуметтік дамуына, соның ішінде су тасқынынан зардап шеккендерге көмекке 3,5 миллиард теңгеден астам қаржы бөлді», — деді ұлттық компания басшысы.

Қасым-Жомарт Тоқаев геологиялық барлау мен ресурстық базаны толықтырудың маңыздылығын айта келе, бұл бағыттағы жұмыстарды жалғастыруды тапсырды.