«Қазақтелеком» жыл соңына дейін Tele2 мен Altel-ті сатады

Үкімет операторлар арасында бәсекелестік орнатып, сапалы тарифке қол жеткізу үшін кәсіпорынға бұрын да осындай талап қойған болатын.

Ұлттық экономика министрлігі Министрлер кабинетінің «2021 - 2025 жылдарға арналған жекешелендірудің кейбір мәселелері туралы» қаулысының жобасына өзгеріс енгізді. Құжатқа сәйкес, «Қазақтелеком» «Мобайл Телеком-Сервис» ЖШС-ны бәсекелес ортаға беруі тиіс. Мәміле 2024 жылдың соңына дейін аяқталады деп жоспарланған.

Мәселе Mobile Telecom-Service иелігіндегі Tele2 және Altel операторларын сату туралы болып отыр. Кезінде ұлттық компания оларды 255 миллиард теңгеге сатып алған. Естеріңізге сала кетейік, Қазақтелекомның байланыс пакетіне Kcell және Activ кіреді.

Өткен жылы Цифрлық даму министрі Бағдат Мусин үкімет «Қазақтелеком» АҚ алдына операторлардың бірін кәсіпорын құрылымынан шығару міндетін қойғанын айтты. Сонда Мусин Kcell акциялары аукционға түседі деп болжады.