Қазақтарды «мамбет» деп кемсіткен қарағандылық Алика Мухамадиева қамалды

Threads-ке жазған жазбасы үшін қарағандылық модель Алика Мухамадиева қамалды. Ол 7 жылға дейін бас бостандығынан айырылуы мүмкін, деп хабарлайды Orda.kz.

Қазақстанда әлеуметтік желілерде, әсіресе, Threads-те қазақша сөйлеуді талап ететін азаматтарға қатысты «казахшасөйлешник» деп айдар тағып, түрлі теріс пікір жазатындар көбейді. Осы тақырыпта қоғам арасында дау туып, тілге, ұлтқа қатысты тіл тигізген желі қолданушыларына азаматтар арыз жазып жатыр. Солай қамалған қарағандылық модель Алика Мухамадиеваға (Alika_Augustovа) Қазақстан Республикасының Қылмыстық кодексінің 174-бабы «Әлеуметтік, ұлттық, рулық, нәсілдік, таптық немесе діни алауыздықты қоздыру» бабы бойынша іс қозғалды. Бұл бап екі жылдан жеті жылға дейін бас бостандығынан айыру жазасын қарастырады.

Әлеуметтік желіде тарап кеткен суреттерге қарасақ, Алика Мухамадиева әуелі «полукалбитский диалог» деп, «жартылай қарабайырлардың диалогы» деп кемсіте сөз бастайды.

«Ең сорақысы – «қазақша сөйле!» деп бақырып (ред. тікелей мағынада дөрекі сөз жазылған), жанын салып жүрген қазақтардың ақыры өздері осылай сөйлеп жүргенін көру...» деп жазылған. 

Артынша Алика Мухамадиева кешірім сұрап бейнежазба жариялады. 

Желі қолданушылары бұл жазбаларды ұлт арасына іріткі салатын әрі ұлттық намысқа тиетін сөз деп бағалап, шағым түсірген еді.