Қазақстанның үш қаласында терроризмді қаржыландырды деген күдіктілер ұсталды

Діни радикалдардың әрекетін жолын кесу операциясы аясында терроризмді насихаттады және қаржыландырды деген күдікпен Астана, Шымкент қалалары мен Ақтөбе облысының үш тұрғыны ұсталды.

Бұл туралы Ұлттық қауіпсіздік комитетінің баспасөз қызметі хабарлады.

Күдіктілердің барлығы қамауға алынды.

«Қазіргі уақытта аталған істердің барлық мән-жайын анықтау бойынша жедел-іздестіру шаралары жүргізілуде» деп түсіндірді Ұлттық қауіпсіздік комитеті.

Қазақстан Республикасының Қылмыстық кодексi 256-баптың 2-бөлігі және 258-баптың 1-бөлігі бойынша сотқа дейінгі тергеу басталды.

2023 жылдың 22 желтоқсанында Алматы әуежайында лаңкестік топқа қосылуға бел буған Қазақстан азаматы ұсталды. Ол бұрын ұрлық, зорлау және кісі өлтіру үшін сотты болған.