Қазақстанның темір жолдары 60 пайызға тозған

Премьер-министр Әлихан Смайылов Қазақстанның теміржол инфрақұрылымының 60 пайызының тозығы жеткенін айтты.

Үкімет отырысында Смайылов тез арада шешімін табуды талап ететін бірқатар мәселелерге тоқталды.

«Бүгінде жылжымалы құрамның және магистральдық желілердің тозуы 60 пайызға жуықтайды. Осының барлығы пойыздар қозғалысы жылдамдығына және теміржолдың өткізу қабілетіне әсер етеді.
Сондай-ақ, транзит, экспорт және импорт көлеміне әсер ететін шекарадағы жүктерді өткізуге қатысты сұрақтар туындайды. Сол себепті құжаттарды қарауға және дайындауға аз уақыт жұмсайтын бизнес үшін «бір терезе» құру қажет. Барлық қызмет жылдам әрі синхронды жұмыс істеуі керек», - деді Премьер-Министр. 

Үкімет басшысы сонымен қатар қазіргі уақытта жалпы ұзындығы бес мың шақырымға жуық қолданыстағы магистральдық теміржол желілері жаңғыртылып жатқанын айтты.

«Қазақстан арқылы Азия мен Еуропа арасындағы транзиттік жүк тасымалы жыл сайын артып келеді. Тек өткен жылы Қазақстан мен Қытай арасындағы теміржол арқылы жүк тасымалы 23 миллион тоннадан астам болса, биыл бұл көрсеткіш тағы 22 пайызға өсті.
Тасымалдау көлемінің қарқынды өсуі жағдайында инфрақұрылымды дамыту және жылжымалы құрамды жаңарту бойынша жүйелі жұмыс жүргізу қажет. Осы мақсатта алдағы үш жылда ұзындығы 1 мың шақырымнан асатын жаңа теміржол желілері салынады», - деді Премьер-Министр.