Қазақстанның негізгі астықты аймақтарындағы жағдай көңіл көншітпейді

 Қазақстанның негізгі астықты аймақтарында екі аптадан бері жауын-шашын тоқтамай, алдағы өніс алуға деген болжам көңіл көншітпейді, деп хабарлады Премьер-Министрдің баспасөз қызметі.

«Ауыл шаруашылығы министрі Айдарбек Сапаров астық жинау науқанына байланысты жедел штаб отырысын өткізді. Егін жинау науқаны қызған шақта шаруалардың ең өзекті мәселелері – астықты кептіруге арналған қолжетімді дизель отыны; ауа райының қолайсыздығынан зардап шеккен фермерлерге несие беруді ұзарту; субсидиялар бойынша қарыздарды жабу. Қазақстанның негізгі астықты аймақтарында, атап айтсақ,  Қостанай, Павлодар, Солтүстік Қазақстан, Ақмола облыстарында соңғы екі аптада жауын-шашын тоқтаған жоқ. Қазгидромет болжамы көңіл көншітпейді: жаңбыр 17 қыркүйекке дейін жалғасады, одан соң аяз күтілуде, сол себепті солтүстік облыстарда жаңа астық сапасының, оның өнуі мен ылғалдылығының нашарлау қаупі жоғары»  делінген сенбідегі хабарламада. 

Сапаров айтқандай, қазіргі жағдайда  ауа райының қолайсыздығы салдарын барынша азайту, шаруаларға барлық қажетті қолдау көрсету және келесі жылдың сапалы тұқым қорын қамтамасыз ету – басты міндет».

8 қыркүйектегі жедел мәліметтер бойынша Қазақстанда 4,8 миллион гектар дәнді дақылдар жиналды, бұл орылған алқаптың 28 пайызын құрайды. Орташа өнімділік 10 ц/га болғанда 4,8 млн тонна астық бастырылды.