Қазақстанның футбол клубтары қай бай-бағланның қолына өтеді?

Қазақстанның футбол клубтары жеке қолға өтеді. Бұған дейін Тоқаев мемлекеттік қаржыландыруға шектеу қойылғанын, футболшылардың ақысы бюджеттен төленбейтінін айтты, деп хабарлайды Orda.kz.

Премьер-министр Олжас Бектенов депутат Нартай Аралбайұлының сауалына жауап беріп, қазақстандық футбол клубтарын кімдердің сатып алуы мүмкін екенін айтты. 

• «Орталық Азия отын-энергетикалық компаниясы» АҚ (Сергей Кан) «Қызыл-Жар» футбол клубын сатып ала алады;
• Freedom Finance (Тимур Турлов) «Шахтер» футбол клубы үшін стадион мен академия салғысы келеді;
• Kaspi Group (Михаил Ломтадзе) «Жеңіс» футбол клубын сатып алуды және Астанада футбол инфрақұрылымын салуды көздеп отыр;
• TAU GROUP LTD (Ислам Қозыбақов) «Қайсар» футбол сатып алуды жоспарлап отыр.

Бектеновтің айтуынша, «Тараз», «Елімай» және «Ертіс» клубтары бойынша келіссөздер жүргізіліп жатыр екен.

Айта кетейік, 2025 жылы футболға 34,9 млрд теңге бөлінген. Оның ішінде 31,8 млрд қаржы кәсіби командаларға, ал 3,1 млрд қаржы балалар мен бұқаралық спортқа салыныпты. 

Футбол саласына жасалған аудит нәтижесі бойынша, 100-ден астам заң бұзушылықтар анықталды. «Ақтөбе» және «Қызылжар» футбол клубтарына қатысты сыбайлас жемқорлық белгілері табылды. Ақтөбе облысының прокуратурасы ойыншыларға негізсіз берілген бонустар мен 250 млн теңгеден астам мақсатсыз жұмсалған қаржыны анықтады.

2026 жылдан бастап жаңа ережелер енгізіледі. Яғни, легионерлерді бюджет пен квазимемлекеттік сектор есебінен қаржыландыруға тыйым салынады. Әкімдіктер бір клубты қолдау үшін 500 АЕК (1 966 000 теңге) артық бөле алмайды. Шетелдіктерді бюджеттен қаржыландыруға тыйым салынады.

Сонымен қатар, 2026 жылдан бастап мемлекет балалар мен жасөспірімдер мектептерінің жаттықтырушыларына жалақыны 30%-ға өсіреді.

Айта кетейік, Астана соты 5 адамды саяси қуғын-сүргін құрбаны деп танудан бас тартты.