Қазақстанның бірнеше қаласы мәртебесін жоғалтуы мүмкін

Қазақстандағы үш елді мекен мәртебесін өзгертіп, ауыл санатына көшуі мүмкін.

«Ашық НҚА» порталында «Қазақстан Республикасындағы жергілікті өзін-өзі басқаруды дамытудың 2025 жылға дейінгі тұжырымдамасын бекіту туралы» заң жобасы орналастырылды.

Құжат авторлары елдегі бірнеше қаланың мәртебесін өзгертуді ұсынып отыр.

«Әкімшілік-аумақтық заңнама талаптарына сәйкес келмеген жағдайда, олардың әкімшілік мәртебесін өзгерту бойынша кезең-кезеңімен жұмыс жүргізілетін болады (Степняк 3,8 мың адам, Темір 2,1 мың адам, Жем 1,5 мың адам әкімшілік-аумақтық заңнамаға сәйкес мәртебесіне сай емес)» деп түсіндірме жазбада көрсетілген.

Сондай-ақ, жоба бойынша Қарабұлақ, Бейнеу, Ұзынағаш сынды тұрғындары көп ауылдарды жақын маңдағы қалалардың құрамына қосу жоспарлануда.