«Қазақстанға қайтпа»: Жұрт желідегі әйелдің ұлына берген кеңесін қызу талқылап жатыр

Қазақстандық әйел әлеуметтік желіде кең тараған бейнежазбада ұлына Франция университетін тәмамдаған соң отанына оралмауға кеңес берді. Бұл бейнежазба тез таралып, желі қолданушылары қызу талқылап жатыр, деп хабарлайды Orda.kz. 

Оның айтуынша, ұлына «мардымсыз жалақыға, таныс-тамырмен және мамандығы бойынша емес» жұмыс істемесін деп осындай кеңес беріпті.

«Бүгін менің ұлым Францияда бакалавр дипломын қорғады. Бұған жету бізге оңай болмады. Оған да, бізге де қиын болды. Оны тіпті Макдональдсқа жұмысқа алмады. Жұмыс беруден бас тартқандар қажетті білігі жоқ екенін айтты. Ол мамандығы бойынша жұмыс тапқанда біз ипотекамызды төлегендей жеңілдеп қалдық. Салыстырып қарасақ бұл Қазақстан ЖОО-ларының оқу ақысын төлегеннен де арзан болды. Француз, орыс, ағылшын, қазақ тілін біліп тұрып, мұнда мардымсыз жалақыған жегілуге не үшін оралуы керек? Таныс іздеп не керек? Қайдағы бір «ағашканың» артынан тиын-тебен жинап жүрсін бе? Өздеріңіз шешіңіздер», — деді әйел.

Бұл кеңес желі қолданушылары арасында қызу пікірталас тудырды. Бір тарап туған жерге адалдық танытып, қайта оралу керек десе, екіншілері адам жақсы өмір сүруі керек екенін айтып, елдегі әлеуметтік жағдай мен «таныс-тамыр» арқасында жұмысқа тұруды сынады.