Қазақстанға 250 тоннадан астам ресейлік бидай әкелмек болған

Қазақстанға Ресейден 250 тоннадан астам ресейлік бидай импорттамақ болды, деп хабарлайды ҚР Ауыл шаруашылығы министрлігінің баспасөз қызметі.

«6 қыркүйекте Батыс Қазақстан облысының теміржол фитосанитарлық бекеттерінде аумақтық инспекция инспекторлары Ресей Федерациясының Саратов облысынан төрт вагон бидай (251 тонна) тауып, кері қайтарды. Вагондар Талдықорғанға бет алған» делінген хабарламада.

Қазақстанға астық әкелуге тыйым салынғаннан бері тыйым салынған өнімдерді заңсыз әкелу әрекеттері көп болғаны да хабарланды.

«Бұл факт астықты заңсыз алып өту әрекеттерінің жалғасып жатқанын көрсетеді» делінген хабарламада.

Естеріңізге сала кетейік, ҚР Ауыл шаруашылығы министрлігі үшінші елдер мен ЕАЭО мемлекеттерінен бидай импортына уақытша тыйым салған болатын.