Қазақстандықтардың жеке деректерін 5000 теңгеге сатқан

Қостанайлық алаяқ қазақстандықтардың жеке деректерін 5000 теңгеге сатып келген деп хабарлайды Orda.kz.

 Қостанай қаласының тұрғыны қолданушылардың жеке деректерін жинап, оларды даркнетте және Telegram арқылы 5000 теңгеге (бір файл үшін) сатқан. Дегенмен, баға деректердің түріне байланысты өзгерген. ІІМ мәліметінше, ол осылайша 1,5 млн теңгеден астам табыс тапқан. Сонымен қатар, ол банктік карталарының реквизиттерін де сатқан.

Қазіргі таңда, жас жігіт  ұсталып, сотталды.

«Телефон алаяқтығы қарқын алуда. Сенгіш адамдарды алдап, олардың ақшасын алып, үлкен несиеге батыруда», — деп толықтырды министрлік.

Осындай қылмыстар қатарында ауру адамдарға ақша жинау да жиі кездеседі, оған жанашыр әрі қамқор азаматтар өз қалталарынан ақшаларын шығарып береді. Мәселен, Шымкент қаласының тұрғыны балаларды емдеуге қаражат жинағанын айтып, ақша жинап келген, алайда балалардың ата-аналары бұл туралы ештеңе білмеген.

ІІМ азаматтарды өздерінің құпия сөздерін және басқа да деректерін бейтаныс адамдарға бермеуге, сенімге кіргісі келетін алаяқтардың айласын ескеруге шақырады.