Қазақстандықтардың шоттары енді салық бойынша аздаған қарыздары үшін бұғатталмайды

Жаңа Салық кодексінің жобасы бизнесті қолдауға бағытталған өзгерістерді көздейді. Енді азғантай салық қарыздары үшін кәсіпкерлердің банк шоттары бұғатталмайды, деп хабарлайды Orda.kz.

Мемлекеттік кіріс комитеті еске салып өткендей, қолданыстағы нормалар бойынша, егер салық төлеушінің тіпті ең төменгі қарызы бір теңге болса да оған мәжбүрлеп өндіріп алу шаралары қолданылуы мүмкін. Ендігі қарастырылған ерекшелік - банк шоттары бойынша шығыстарды оқшаулау, тек алты АЕК-тен жоғары борыш болса ғана қолданылады.

 Егер компания немесе кәсіпкер тәуекелдің орташа немесе жоғары дәрежесіне жататын болса, оларға берешек туындаған сәттен бастап бес жұмыс күнінен кешіктірмей өтеу қажеттігі туралы хабарлама жіберіледі.

Жаңа кодекс жобасы осы тәсілді өзгертуді ұсынады. Анағұрлым икемді жүйе енгізілуде: бұдан былай тәуекел дәрежесіне байланыстыру болмайды. 

Егер борыш 20 АЕК-тен аз болса, салық төлеушіге - ешқандай кедергісіз және шектеусіз  ескерту ғана жіберіледі және өсімпұл есептеледі. Берешек 20-дан 45 АЕК-ке дейін болса, анағұрлым қатаң шаралар қолданыла бастайды - шот бойынша шығыс операцияларын оқшаулау, өсімпұл есептеу, инкассалық тапсырма беру шаралары қолданылады.

Егер қарыз 45 АЕК-тен асатын болса, борышкерге барлық, оның ішінде ең қатал шаралар қолданылады. Бұл мүлікті түгендеу және сату, контрагенттерден қарыздарды өндіріп алу, шетелге шығуды шектеу және сот шешімі бойынша қарыз үш ай ішінде өтелмеген жағдайда, тіпті банкроттық рәсім басталады.

30 сәуірде Мәжіліс жаңа Салық кодексін мақұлдады. ҚҚС мөлшерлемесі 20% -дан 16% -ға дейін төмендетілді, ҚҚС бойынша міндетті тіркеу шегі 40 млн теңгеге дейін ұлғайтылды. Бірқатар тауарлар мен қызметтер ҚҚС төлеуден босатылды. Банктер мен ойын бизнесі үшін салық көлемі артты, ал ЖКС бойынша ыңғайлы шкала енгізілді.