Қазақстандықтар бұдан былай букмекерлік кеңселердің жарнамасын SMS арқылы алмайды

2024 жылдың 8 шілдесінде ойын бизнесі және лотерея қызметі туралы заң қабылданды. Бүгін, 2024 жылғы 18 шілдеде ОКҚ брифингінде туризм және спорт вице-министрі Мирас Төлебаев заңның негізгі бөлімдері туралы айтып берді.

Заң сегіз Кодексте және 14 заңда 150 түзетуді көздейді, 18 норма бойынша реттеушілік әсерге талдау жүргізілді.

Енді букмекерлік кеңселердің сыртқы жарнамасына заңмен тыйым салынды. Ерекшелік тек букмекерлік кеңселер, спорт ғимараттары мен спортшылардың жабдықтары үшін жасалады.

"Интернет-ресурстарды қоса алғанда, бұқаралық ақпарат құралдарына қатысты да осындай норма көзделген. Халықаралық жарыстардың тікелей эфирін жүргізетін спорттық бұқаралық ақпарат құралдары мен спорттық емес жергілікті арналарға ерекше жағдай жасалды. Сонымен қатар, азаматтар букмекерлік кеңселердің жарнамасын SMS арқылы алмайды. Заң бұзушылар үшін әкімшілік жауапкершілік көзделген", - деді Төлебаев. 

Борышкерлердің бірыңғай тізіміне енгізілген адамдарды құмар ойындарға және бәс тігуге мүмкіншілік беруге тыйым салынады. Борышкерлерді, 21 жасқа толмаған қазақстандықтарды және өзін – өзі шектегендерді құмар ойын ойнауға мүмкіншілік бергендерге әкімшілік жауапкершілік енгізіледі - лицензиясы тоқтатыла отырып, бір миллионнан 3,7 миллион теңгеге дейін айыппұл салынады.

Бұған дейін, букмекерлік кеңсе Ringobet.kz лицензиядан айырылды және заңнаманы бұзғаны үшін айыппұл төледі.