Қазақстандық шенеуніктердің Украинаға заңсыз оқ-дәрі сатуы мүмкін екені анықталды

Румынияда Қазақстан мен Болгария шенеуніктерінің қатысы бар ірі жемқорлық ісі әшкереленді. Тергеу дерегінше, олар оқ-дәрі саудасы арқылы заңсыз пайда табуға тырысқан, деп хабарлайды Orda.kz.

Қазан айының басында Румыниядағы «Romtehnica» компаниясының директоры Разван Минкуге Болгария мен Румынияның бірнеше кәсіпкері хабарласқан. Солардың бірі — болгариялық «Sofia Arm Tech» компаниясының басшысы Роман Иванов. Олар Минкуге Қазақстан арқылы оқ-дәрі сатып алып, кейін оны басқа елдерге қайта сатуды ұсынған.

«Маған Қазақстаннан оқ-дәрі әкеліп, оны өзге жаққа өткізу туралы айтты», — дейді Разван Минку Europa Libera Romania радиосына берген сұхбатында. 

Минкудің сөзінше, бұл адамдар өздерінің румын саясаткерлерімен байланысы бар екенін айтқан. Алайда ол істі тек заң аясында жүргізуге келіскен.

Сол саясаткерлердің бірі ретінде Румыния Экологиялық гвардиясының бұрынғы басшысы Октавиан Берчавудың аты аталды. Ол Europa FM радиосына берген сұхбатында қорғаныс министрі Ионуц Моштянға пара беру ісіне араласуға ұсыныс алғанын мәлімдеді

Жемқорлыққа қатысы барлар Қазақстаннан ресейлік үлгідегі оқ-дәрілерді сатып алып, оларды румын үлгісінде көрсетіп, кейін Еуропалық қорғаныс қоры SAFE-ке сатуды жоспарлаған. Ал Берчануның айтуынша, бұл оқ-дәрілер Украинаға жөнелтілген. Бұл жоспарға Қазақстан шенеуніктері де қатысқан болуы мүмкін.

«Мен Қазақстандағы жеке компанияны емес, мемлекеттік органдарды айтып отырмын», — деді Берчану.

Алайда ол Қазақстаннан нақты кімдердің бұл іске қатысы бар екенін ашып айтпады.