Қазақстандық паралимпиада чемпионының қалай қаза болғаны белгілі болды

Полицияның мәліметіне сүйенсек, қазақстандық паратаэквондист Нышан Өмірәлі көлігімен келе жатқанда алдынан түйе шыққан, деп хабарлайды Orda.kz.

Апат 2024 жылдың 1 қазанында сағат 22:15-те Батыс Еуропа — Батыс Қытай автожолының 542 шақырымында болды. Спортшы Түркістан облысынан Тараз бағытына қарай өзінің  «Ниссан Максима» көлігімен келе жатқан кезде жолға шыға келген түйеге соғылды.

«Соғылған соң көлікте жалғыз өзі болған көлік жүргізушісі ауыр жарақат алып, Тараз қалалық №1 ауруханасына бара жатқан жолда көз жұмды. Полиция адам өліміне әкелген жол қозғалысы ережелерін бұзу бойынша ҚР ҚК 345-бабының 3-бөлігі бойынша сотқа дейінгі тергеу бастады»,  деп хабарлады полиция.

Нышан Өмірәлі — қазақстандық паратаэквондист, екі дүркін әлем чемпионы және Токио-2020 мен Париж-2024 жазғы Паралимпиада ойындарының қатысушысы.

Оның қазасы туралы бүгін Ұлттық паралимпиада комитеті хабарлаған соң белгілі болды.