Қазақстандық «Болашақ» стипендиаттары Флоридадағы атыс кезінде зардап шекпеді

Флорида штатындағы университетте болған атыстан «Болашақ» стипендиаттары зардап шеккен жоқ, деп хабарлайды Orda.kz. 

Флорида мемлекеттік университетінің (FSU) кампусындағы атыс кезінде «Болашақ» бағдарламасы бойынша оқитын қазақстандық студенттердің ешқайсысы зардап шекпегені белгілі болды. Бұл туралы халықаралық бағдарламалар орталығының баспасөз қызметі мәлімдеді. 

Халықаралық бағдарламалар орталығының мәліметінше, ЖОО-да қазақстандық төрт студент оқиды. Олардың үшеуі магистратурада және біреуі докторантурада оқиды екен. Қазақстандықтардың бәрі қауіпсіз аймаққа орналастырылды.

Еске салайық, кеше, 17 сәуір күні Флорида штатындағы университетте атыс болып, екі адам қаза тапты. Сонымен қатар алты адам жарақат алды. Күдікті 20 жастағы студент — Феникс Айкнер. Ол өгей шешесі Джессика Икнерге тиесілі мылтықты қолданған. Қайғылы оқиғадан қаза тапқандардың арасында университеттің студенттері жоқ.

Еске салайық, университетте атыс ұйымдастырған ер адам полицейдің ұлы болып шықты.