«Қазақстандық бір марқұмның туысына берілді»: Ресей AZAL апатында мерт болғандардың жақындарына өтемақы төледі

Ресейдің сыртқы істер министрлігі Azerbaijan Airlines әуе компаниясының ұшағы апатқа ұшырағаннан кейін сақтандыру міндеттемелері орындалмады деген хабарларды теріске шығарды, деп хабарлайды Orda.kz.

Ведомство БАҚ-тағы және Telegram-арналардағы ақпараттарды «жалған және оқиғаны пайдалану» деп атады.

«АльфаСтрахование сақтандыру компаниясы төлемдерді ақпанда бастаған. Әуе кемесіне келтірілген залал толық өтелді. Жалпы 1,003 миллиард рубль. Сондай-ақ 62 жолаушының 46-сының қаза табуына немесе жарақат алуына байланысты талаптар реттелді. Соның ішінде Қырғызстанның үш азаматы мен 38 әзірбайжандықтың 35-і бар. Төленген өтемақының қазірдің өзінде 358,4 миллион рубльге жетті»  деп жазылған мәлімдемеде.

Қазақстаннан 6 жолаушы осы апатта қаза болған еді. Соның біреуінің туысына өтемақы берілді.

«Рейстегі 62 жолаушының 46-сының жарақаты мен қазасы бойынша талаптар толығымен қанағаттандырылды: 15 ресейлік азаматтың – 7-іне; 38 әзірбайжандық азаматтардың – 35-і үшін; барлық 3 қырғыз азаматы үшін; 6 қазақстандықтың біріне өтемақы берілген» деп жазылған министрліктің хабарламасында.

Еске сала кетейік, Әзірбайжан президенті Илхам Әлиев Ақтау маңында құлаған «Azerbaijan Airline» (AZAL) ұшағының апатқа ұшырауын қасақана шабуыл деп санамайтынын айтты. Алайда апатқа кінәлілердің жауапқа тартылуын талап етті.