Қазақстандық ауыр атлет жасөспірімдер арасында әлем чемпионы атанды

2024 жылдың 26 ​​мамырында ауыр атлетикадан Қазақстан жастар құрамасының өкілі Нұрдос Сабыр Лимада (Перу) өткен турнирде әлем чемпионы атанды, деп хабарлайды Orda.kz.      

Қазақстан Республикасы Ұлттық Олимпиадалық комитеті атап өткендей, 89 келіге дейінгі салмақ дәрежесінде оған тең келетін ешкім болған жоқ. Қоссайыс бойынша зілтемірші 333 (148+185) келі көтерді.

Армениялық Валерик Мовсесян 329 келімен екінші орын алды. Бекзод Гофиржонов (Өзбекстан) үшінші нәтиже көрсетті – 324 келі.

Өткен жылы Сабыр әлем чемпионатында екінші орын алған болатын.

Қазақстан құрамасының еншісінде екі жүлде бар. Бұған дейін Ақжол Құрманбек 67 келі салмақ дәрежесінде күміс алған болатын.

Болгарияда өткен Challenge Cup әлем чемпионатында Қазақстан үш медаль: екі алтын және бір қола жеңіп алды.