Қазақстандағы жасөспірімдердің есірткі қылмысына қатысуының басты себебі

Ішкі істер министрлігінің есірткі қылмысына қарсы күрес басқармасының қызметкерлері студенттер мен мектеп оқушыларының есірткі сатушылардың оңай олжасына айналу себебін түсіндірді.

Тәртіп сақшыларының айтуынша, жастардың есірткі қылмысына баруының басты себебі – жазаның ауырлығын сезінбеуінен.

Полиция қызметкерлері студенттер арасында жүргізген сауалнамасы олардың есірткіге қатысты кез келген әрекеттің міндетті түрде ұстауға және ұзақ мерзімге бас бостандығынан айыруға әкелетінін түсінбейтінін көрсетті.

«Студенттер мен жасөспірімдер есірткі сатушылардың оңай олжасына айналады. Тәуелсіз өмір жолын бастап, бос уақытында ақша табуға тырысқан жастар кез келген заңға қайшы әрекеттердің жауапкершілігін сезіне бермейді», - дейді Ішкі істер министрлігінің есірткі қылмысына қарсы күрес департаменті басшысының орынбасары Бақытжан Әмірханов. 

Ол жастардың есірткіге қатысты барлық әрекеттерге толық жауапкершілікке тартылатынын еске салды.

«Есірткі тығушы немесе есірткі курьері 7 жылдан 15 жылға дейін бас бостандығынан айырылуы мүмкін. Интернетте есірткіні жарнамалағаны, насихаттағаны, кейбір дәрі-дәрмек туралы форумдарда оң пікір жазғаны үшін үш жылдан алты жылға дейін бас бостандығынан айыру жазасы қарастырылған», - деді Бақытжан Әмірханов.