Қазақстандағы ірі әуе компаниялары тұтынушыларды алдаған – көлік прокуратурасы

30 қыркүйек 2023 12:21 Ләззат Сұңқар

Бас көлік прокуратурасында Үйлестіру кеңесі өтті. Кеңесте қадағалау органы өкілдері жеңілдіктер мен рейстердің кешігуіне байланысты өтемақыларды бақылаудың жаңа шараларын талқылады.

Белгілі болғандай, бұған дейін кейбір әуе тасымалдаушылары ұшақ бортында қауіпсіздік ережелерін сақтамақ түгілі, жолаушылар құқықтарын да ескермеген, деп хабарлайды Orda.kz.

Сонымен қатар, тасымалдаушылар халықаралық рейстерде 2 жастан 12 жасқа дейін, ал ішкі рейстерде 2 жастан 15 жасқа дейінгі кәмелетке толмаған жолаушыларға 50 пайыздық жеңілдіктер қолдану талаптарын сақтамаған.

«Мәселен, ірі авиакомпаниялардың бірі веб-сайтта билеттерді сатқан кезде жолаушыларға 11 жасқа дейінгі балалар тарифін қолданады, ал заң бойынша ол 15-жасқа дейін болу керек. Ал билеттерді агрегаторлар арқылы (сатып алуға арналған онлайн өтінімдер) билеттер) сатып алғанда, «жеңілдік» мүлде қолданылмайды. Бұған дейін прокуратураның актісіне сәйкес FlyArystan және Qazaq Air әуе компаниялары халықаралық рейстерде «балаларға жеңілдік» бермегені үшін әкімшілік жауапкершілікке тартылған» деп хабарлады мекеме.

Азаматтық авиация комитетіне кәмелетке толмағандар үшін жеңілдіктердің дұрыс қолданылуын жүйелі бақылауға мүмкіндік беретін алгоритм әзірлеу, сондай-ақ жолаушыларды әуе тасымалы саласындағы қызметтерді дұрыс көрсетпеу туралы хабардар етуді міндеттейтін заңнамалық түзетулер енгізу тапсырылды.

Бұл ретте, Тұтынушылар құқықтарын қорғау комитеті мүдделі органдармен бірлесе отырып, әуе компанияларынан рейсті кешіктіргені үшін айыппұл (әр сағатқа билет құнының 3%) өндіріп алу үшін сотқа шағымдану, сондай-ақ балалар билеттері үшін артық төленген соманы қайтару мәселесін зерделейді.

«Осымен бірге Әкімшілік құқық бұзушылық туралы кодекске жолаушыларды кешігулер туралы уақтылы хабарламау, балаларға, мүгедектерге жеңілдікті қызметтерді көрсетпеу сияқты құқық бұзушылықтарды бөлек көрсететін бірқатар түзетулер енгізу мәселесін пысықтау жоспарлануда» деп нақтылады бас көлік прокуратурасы.

Отырысқа қатысушылардың сөйлеген сөздерін талқылай келе, бірінші кезекте мемлекеттік органдардың өзара іс-қимыл процестерін цифрландыруға, сондай-ақ объективті бақылау жүйелерін жетілдіруге бағытталған бірқатар тұжырымдамалық шешімдер қабылданды.

Енді «Мемлекеттік жер кадастры» автоматтандырылған ақпараттық жүйесі әуеайлақ аймағында жер телімдерін беруді шектейтін болады. Сондай-ақ кеңес мүшелері жолаушыларға авиакомпаниялар мен әуе тасымалы қызметін көрсететін басқа да субъектілердің әрекеттеріне немесе әрекетсіздігіне QR кодтарын пайдалана отырып, электронды шағым беру туралы ұсынысты қолдады.

«Жалпы, прокуратураның жалпы үйлестіруімен цифрландыру мәселесінде белгілі нәтижелер бар. Қазір Авиация әкімшілігінің деректер базасы Денсаулық сақтау министрлігі жүйесімен біріктірілген, бұл уәкілетті тұлғаларға онлайн режимде ақпарат алуға мүмкіндік береді» деді көлік прокуратурасы.

Барлық тапсырмалар бойынша нақты мерзімдер белгіленді және олардың орындалу барысы Үйлестіру кеңесінің Хатшылығының бақылауында болады.

Бұған дейін алдағы екі жылда Қазақстаннан АҚШ-қа тікелей әуе қатынасы ашылуы мүмкін екені белгілі болған еді.

Жаңалықтар

барлық жаңалықтар