Қазақстандағы алғашқы АЭС атауына жарияланған байқау аяқталды

Оған 27 000-ден астам адам қатысты, деп хабарлады Orda.kz.

Байқау 25 қыркүйекте eGov Mobile мобильдік қосымшасы арқылы басталып, 10 қазанға дейін жалғасты.

«Азаматтардың мұндай жоғары реакциясы елдегі атом энергетикасын дамытуға деген үлкен қызығушылықты білдіреді» деп есептейді ҚР Атом энергиясы агенттігі.

Қазір ұсыныстарды өңдеу процесі басталды. Мамандар нұсқаларға талдау жасап, жүйелендіру жүргізеді, содан кейін материалдарды конкурстық комиссия қарайды.

Қорытынды қазанның соңында, Қазақстанның алғашқы АЭС атауы жарияланғанда белгілі болады.

«Бұл оқиға ел энергетикасын дамытудың жаңа кезеңінің бастауы болады»,  деп атап өтті ведомство. 

Естеріңізге сала кетейік, Қазақстанда алғашқы атом электр станциясы ресми құрылысы тамыз айының басында басталатыны айтылды.

Биылғы қыркүйек айының басында Атом энергиясы агенттігінде Алматы облысында салынатын бірінші атом электр станциясының үздік атауына байқау өткізу жөніндегі жұмыс тобының отырысы өтті.