Қазақстанда «жыр» болған 600 мыңның торты: Сот басталды

Әлеуметтік желіде Қазақстан мен алыс-жақын шетелге «жыр»  болған 600 мыңдық даулы тортқа қатысты сот отырысы басталды. Торт авторы моральдық шығын үшін үш миллион талап етті, деп хабарлайды Orda.kz.

Астанада кондитер Нұршат Ақбергенованың 600 мың теңгелік тортына қатысты алдын ала тыңдау өтті. Блогер, құрақшы әрі блогер Аселина Батыр тапсырыс ақысын төлемеген.

Алдын ала тыңдауда кондитердің өкілі Батырдан ауызша келісім бойынша 500 мың теңге қарызды өндіріп беруді, сондай-ақ «жалған ақпарат таратқаны үшін» үш миллион теңге көлемінде моральдық өтемақы төлеуді талап етті. Бұдан бөлек, құрақшыдан әлеуметтік желіге жазған тортқа қатысты жазбаларын ресми түрде теріске шығаруды жариялау сұралды.

Ал айыпталушы тарап соттан желідегі жазбаларға сараптама тағайындауды өтінді.

«Сараптама торт жасаушы мен тапсырыс берушінің жазбаларындағы сөздердің ауырлығын бағалап, кімнің моральдық тұрғыда зардап шеккенін, ал кімнің кибербуллинг құрбаны болғанын анықтап беруі тиіс», — деді Батырдың өкілі.

Сараптамаға қатысты шешім негізгі сот процесі басталғаннан кейін қабылданады.

Алдын ала тыңдау онлайн өтті. Сот процесі ашық форматта, БАҚ өкілдерінің қатысуымен өтеді. Алайда нақты күні әзірге белгісіз.