«Қазақстанда жасалған» атымен жалған өндіріс: Бектенов жосықсыз компанияларды тізімдейді

Премьер-министр Олжас Бектенов үкіметтен мемлекеттік қолдау алған, бірақ  өндіріспен нақты айналыспай отырған компаниялармен қалай күресуді жоспарлап отырғанын айтты, деп хабарлайды Orda.kz.

Бұл туралы министрлер кабинетінің басшысы шағын және орта бизнес форумында айтты.

«Біз барлығымыз толық мемлекеттік қолдауға ие, соның ішінде реттелетін сатып алуларға басымдықпен қатысу мүмкіндігін алған жалған өндірушілерді білеміз. Олар тіпті өндірісті дамытуға қаржы да салмайды, тек импорттық тауарларға «Қазақстанда жасалған» белгісін жапсырумен айналысады», - деп ашынды Бектенов.

Мәселені шешу үшін үкімет отандық тауар өндірушілердің бірыңғай тізілімін әзірлеуде. Мақсат – сыбайлас жемқорлық тәуекелдері мен адам факторын жою. Бұдан былай  компаниялар қызметіне ашық талдау жасау және нақты өндірушілерді анықтау қолға алынады.

«Компаниялар қызметін өте ашық түрде талдап, нақты өндірушілерді анықтау үшін цифрландыруды барынша пайдаланып жатырмыз, олар содан кейін ғана мемлекет тарапынан толық қолдау мен қорғауға ие болады», - деп нақтылады Премьер-Министр.

Сонымен қатар, Бектенов 10 триллион теңгеден астам инвестиция тартуды көздейтін энергетика және коммуналдық секторды жаңғыртудың жаңа ұлттық жобасын жариялады. 

Премьер-Министрдің айтуынша, бұл отандық тауар өндірушілерге үлкен мүмкіндік ашып, тұрғын үй-коммуналдық шаруашылық саласындағы жұмыс істеп тұрған кәсіпорындарды барынша пайдалануды қамтамасыз етеді.

Бұған дейін Президент Тоқаев Қазақстан – Германия бизнес-форумында  «Неміс сапасымен Қазақстанда жасалған!» жобасы туралы айтқан болатын.