Қазақстанда Су ресурстары және ирригация министрлігі құрылады

Бүгін Қасым-Жомарт Тоқаев Қазақстан халқына Жолдауын жариялады. Мемлекет басшысы Жолдаудың басында елімізде ауқымды саяси өзгерістер болатынын атап өтті.

«Елімізде «күшті Президент – ықпалды Парламент – есеп беретін Үкімет» тұжырымдамасы барынша орнықты. «Халық үніне құлақ асатын мемлекет» қағидатын нақты іске асыруымыз қажет. Адам құқығын қорғау саласында маңызды қадамдар жасалды. Әділдікті және заң үстемдігін орнату үшін ауқымды жұмыс жүргізіліп жатыр. Шешім қабылдау үдерісіне азаматтардың қатысу мүмкіндігі артты. Қоғамның саяси мәдениеті мүлде жаңа сипатқа ие болды», -  деді ол.

Сондай-ақ президент Қазақстанда Су ресурстары және ирригация министрлігі құрылатынын мәлімдеді. 

«Еліміз үшін су ресурстарының маңыздылығы мұнайдан, газдан немесе металдан кем емес. Су шаруашылығы жүйесін тиімді дамытумен дербес бөлім айналысуы керек деп ойлаймын. Осыған байланысты Су ресурстары және ирригация министрлігі құрылады», -  деді Тоқаев.