Қазақстанда ресейлік заңды ұры ұсталып, еліне қайтарылды

Ішкі істер министрлігі шетелдік қылмыскерді ұстады.

19 мамырда Батыс Қазақстан облысы бойынша ІІД Ұйымдасқан қылмысқа қарсы күрес департаменті мен Ұлттық қауіпсіздік департаменті елге келген көрші мемлекеттің 61 жастағы азаматын ұстады.

«Жедел мәліметтерге сәйкес, Қазақстанға келген Ресей азаматы қылмыстық ортада «заңды ұры» мәртебесіне ие. Ол ұсталып, Орал полициясына жеткізілді. Қажетті тексеру шараларын жүргізгеннен кейін ұсталған азамат Қазақстан аумағынан Ресей бағытына шығып кеткен, кейін оны көрші мемлекеттің құқық қорғау органдары ұстады» деп хабарлады ІІМ.

Ресейде оның үстінен «Қылмыстық иерархияда жоғары лауазымды иелену» бойынша қылмыстық іс қозғалды.

Сонымен қатар, өткен жылы Қазақстан аумағына көршілес елдерден төрт қылмыскердің кіруіне тосқауыл қойылды.