Қазақстанда Ресей заңнамасын бұзған Өзбекстан азаматтары ұсталды

17 мамырда Өзбекстанның Сыртқы еңбек миграциясы жөніндегі агенттігі ел азаматтарына Қазақстан шекарасынан өткен кезде Ресейде жасаған құқық бұзушылықтары үшін ұсталуы мүмкін екенін ескертті, деп хабарлайды Orda.kz.

Ведомство Қазақстан мен Ресей арасындағы екіжақты келісімдерде әкімшілік және қылмыстық істер бойынша шешімдерді тану және орындау қарастырылғанын атап өтеді. Соның салдарынан соңғы кездері Өзбекстан азаматтары Қазақстан шекарасын кесіп өткенде Ресей заңнамасын бұзғаны үшін ұстала бастады.

«Ұсталғандар Ресей тарапы осы қылмыстар бойынша түпкілікті шешім қабылдағанға дейін түзеу мекемелерінде ұсталады» делінген Өзбекстан үкіметі департаментінің хабарламасында.

Ведомство Ресейде құқық бұзушылық жасаған Өзбекстан азаматтарына Қазақстанға келмеуге кеңес берді.

Осыған дейін Украинамен соғысқа қатыспау үшін Ресей армиясынан қашып кеткен ресейлік Камиль Касимовтың Астанада ұсталғаны белгілі болған еді. Құқық қорғаушылар Қазақстан заңнамасы әскери қылмыс жасады деп айыпталған шетелдіктерді экстрадициялауға рұқсат етпесе де, Касимовты Ресейге алып кетуі мүмкін деп қауіптенеді.