Қазақстанда педофилдерді химиялық кастрациялау туралы жаңа түзету дайындалып жатыр

Қазақстанда педофилдерге қатысты химиялық кастрация қолдану жөнінде жаңа түзету әзірленіп жатыр,  деп хабарлайды Orda.kz.       

«Бостандыққа шығардан алты ай бұрын химиялық кастрация қолдану және жазасын өтеу мерзімі аяқталғанға дейін 12 айдан кешіктірілмей мекеме әкімшілігінің материалдарын сотқа жолдау арқылы сот-медициналық психиатриялық сараптама тағайындау туралы түзету енгізілуде. Бұл сараптама олардың психикалық ауытқулары мен жыныстық зорлыққа бейімділігінің бар-жоғын анықтау үшін қажет» деп жазылған ҚР Денсаулық сақтау министрінің «Медициналық сипаттағы мәжбүрлеу шараларын қолдану қағидаларын бекіту туралы» бұйрығына енгізілетін өзгерістер жобасында. 

Айта кетейік, Қазақстанда химиялық кастрация 18 жастан асқан, кәмелетке толмағандарға қатысты жыныстық қолсұғушылық жасаған адамдарға қолданылады. Бұл — педофилия үшін сотталған, қамауда отырған немесе босатылуы тиіс адамдарға қатысты шара.

Химиялық кастрация тек сот шешімімен және міндетті сот-психиатриялық сараптамадан кейін ғана жүргізіледі. Сараптама сотталушының психикалық тұрғыда есі дұрыс екенін және оның «педофилия» диагнозы бар екенін растауы тиіс. Бұл — мәжбүрлі медициналық процедура, арнайы антиандрогендік препараттардың жүйелі инъекциясы түрінде жүзеге асырылады. Бұл дәрілер жыныстық құмарлықты басады.

Егер сотталған адамға медициналық қарсы көрсетілімдер болса (мысалы, денсаулық жағдайына байланысты), химиялық кастрацияның орнына психотерапиялық ем мен психиатр дәрігерінің тұрақты бақылауы тағайындалады.

2023 жылы Түркістан облысында 5 жасар қызды зорлап өлтірген ер адамға  кастрация жасалатынын хабарлаған болатынбыз. 2021 жылы Шымкентте үш педофилге химиялық кастрация жасалды.