Қазақстанда Оңтүстік Кореяның үш университетінің филиалдары ашылады

Қызылорда және Түркістан қалаларында Оңтүстік Кореяның үш университетінің филиалдарын ашу жоспарланды. Оңтүстік Корея президентінің мемлекеттік сапарына байланысты Астанада өтетін бірлескен бизнес-форум аясында тиісті меморандумдарға қол қойылады.

Бұл туралы ғылым және жоғары білім министрі Саясат Нұрбек мәлімдеді.

«Бүгін бизнес-форумда екі меморандумға қол қойылады. Бұл – Сеул ұлттық ғылым және технология институты (SeoulTech) мен  Қызылорда Қорқыт-Ата университеті бірлесе отырып, алғашқы жасанды интеллект мектебі құрылады», – деді Нұрбек.

Министр Қазақстанда жасанды интеллект бойынша ұлттық стратегия әзірленіп жатқанын атап өтті. Қорқыт ата университетінің студенттері бағдарлама бойынша корей мұғалімдерімен бірге ағылшын және корей тілдерінде білім алып, Оңтүстік Кореяның дипломына ие болады.

«Сонымен қатар, келесі жылдан бастап Түркістанда үлкен кампус ашатын жекеменшік университетпен келісім-шарт жасалады. Бұл филиалдың түлектері еңбек нарығына тікелей қол жеткізе отырып, Кореяда жұмыс істей алады», – деп толықтырды Нұрбек.

Сондай-ақ тараптар Оңтүстік Кореяның жетекші зерттеу университеті болатын Корея ғылым және технология институтымен (KAIST) келісімге қол қойды.

«Біз KAIST Қазақстанды құрып, іске қосамыз. Ол KAIST-тің толық қолдауымен, соның ішінде оқытушылар мен оқыту бағдарламалары арқылы елдегі жетекші зерттеу университеттерінің біріне айналады», – деді министр.

Еске салайық, Оңтүстік Корея президенті Юн Сок Ёл Қазақстанда 13 маусымға дейін мемлекеттік сапармен келді. Сапар барысында Қазақстан президенті Қасым-Жомарт Тоқаевпен келіссөздер және бірлескен бизнес-форум өткізу жоспарланған.