Қазақстанда легионерлерге бюджеттен ақша төлеуге тыйым салынды

Қазақстанда легионерлерді мемлекеттік бюджет есебінен қамтамасыз етуге тыйым салынды. Сенат дене шынықтыру және спорт туралы заңға түзетулерді қабылдады, деп хабарлайды Orda.kz.

Сенат аппаратының басшысы Максим Споткайдың мәліметіне қарасақ, жаңа нормалар бюджет қаражатын тиімді пайдалану мақсатында енгізіліп, басым спорт түрлерін дамытуға бағытталған. Бұл саладағы саясат енді Олимпиада, Паралимпиада, Сурдолимпиада, Азия және Пара Азия ойындарында жоғары нәтижеге қол жеткізуге бейімделеді.

«Ұлттық спорт федерациялары аймақтық федерацияларға қарағанда басымдыққа ие болады. Кәсіпқой клубтарды қаржыландыруға шектеу қойылып, қаражат бұқаралық және балалар-жасөспірімдер спортына бағытталады. Жергілікті билік спорт және дене шынықтыру қызметтерінің бағасын реттей алады. Спорттық медицина мен спортшыларды дайындау стандарттарын дамыту шаралары күшейтіледі» деп жазды Максим Споткай. 

Сонымен қатар спорт саласындағы мемлекеттік ұйым басшылары үшін ротация институты енгізілмек. Шетелдік спортшыларды мемлекеттік бюджет есебінен қаржыландыруға тыйым салынады.