Қазақстанда легионерлерді бюджеттен қаржыландыруға тыйым салынады

13 қараша 2024 14:46 Ислам Әден

Фото: GOV.KZ

Бұл туралы мәжілісте қаралды, деп хабарлайды Orda.kz порталы.

Мәжіліс депутаттары «Кейбір заңнамалық актілерге дене шынықтыру және спорт мәселелері бойынша өзгерістер мен толықтырулар енгізу туралы» заң жобасын бірінші оқылымда мақұлдады. Ол ел азаматы емес спортшыларды бюджеттен қаржыландыруға тыйым салады.

Жобада легионерлерді бюджеттен және квазимемлекеттік сектор субъектілері қаражатынан қаржыландыруға тыйым салу қарастырылған. Спорт министрі Ербол Мырзабосыновтың сөзінше босатылған ақша интернаттар мен спорт мектептеріне жіберіледі.

«Спорттық медицинаны дамытуға, спортшыларды дайындау стандарттарын әзірлеуге және бекітуге, дене шынықтыру және спортпен шұғылдану үшін ең төменгі жасты белгілеуге, сондай-ақ нормативтердің шектен тыс заңнамалық реттелуін жоюға бағытталған стандарттар бар», - деді министр.

Сонымен қатар, олар бірқатар тұжырымдамалар енгізуді жоспарлап отыр:

спорттық медицина;
дене шынықтыру және спорт қоғамы;
спорттық дайындықтың ұлттық стандарттары;

Терминдер: «жетістіктері жоғары спорт түрлері», «спорт түрлері», «паралимпиадалық ойындар», «спорт түрлері бойынша Қазақстан Республикасының командалары», «облыстардың, республикалық маңызы бар қалалардың және астана командалары», «бас жаттықтырушы спорт түрінен Қазақстан Республикасының құрама командасы».

Мәжілісмен Нартай Аралбайұлы бұған дейін Instagram желісіндегі парақшасында Қазақстан азаматы емес спортшыларды бюджеттен қаржыландыруға тыйым салу туралы айтқан болатын. Сондай-ақ мәжілісмен «естімеген» спортқа ақша бөлген министрліктің шешімі енді тоқтатылғанын айтты.

«Спорттың 180 түрін қаржыландыру қысқартылады», - деп атап өтті депутат.

Бұған дейін ҚР Сыбайлас жемқорлыққа қарсы қызметі Туризм және спорт министрлігінде қазақ спортының жай-күйі туралы толық деректер жоқ және жеңімпаздардың, спорт нысандарының, спорт секциялары мен жаттықтырушыларының бірыңғай есебі жүргізілмейтінін мәлімдеген.

«Спорттық кешендер мен футбол академияларын салудың орнына, спорт ұйымдары шетелдік ойыншыларды ұстауға қомақты қаржы жұмсайды» делінген Антикор мәлімдемесінде.

Президент Қасым-Жомарт Тоқаев 2024 жылғы Олимпиада ойындары жеңімпаздарымен кездесуінде шетелдік спортшыларды азаматтыққа қабылдау тәжірибесінен бас тарту керектігін айтты.

«Өйткені кез келген шетелдік ойыншы, әдетте, біздің жас және болашағы зор спортшыларды ұлттық құрамадағы орыннан айырады. Сонымен қатар, қазіргі таңда біз спорт түрінен мықты шетелдік жаттықтырушыларды тарту мүмкіндігін қарастырған жөн. Легионер спортшылар ұзақ мерзімді табысқа қол жеткізе алмайды, бұл жерде кәсіби жаттықтырушылық әдіс маңызды», - деді мемлекет басшысы.

Жаңалықтар

барлық жаңалықтар