«Қазақстанда көмір өндірісі тоқырады»: Көмір бағасы қаншаға қымбаттады?

Қазақстанда 2024 жылдың қаңтар-тамыз айларында қатты көмір, лигнит және көмір концентраты өндірісі 69,4 миллион тоннаға жетіп, өткен жылмен салыстырғанда 7,3% төмендеді, деп хабарлайды Orda.kz.

Energyprom мәліметтеріне қарасақ, өткен жылы да көмір өндірісі 2% -ға азайған болатын. Өндірістің негізгі бөлігі Павлодар, Қарағанды және Абай облыстарында шоғырланған. Осы үш аймақта жыл басынан бері өндірілген көмірдің жартысынан көбі Павлодар облысына, шамамен үштен бірі Қарағанды облысына, қалғаны Абай облысына тиесілі.

Елдегі негізгі көмір игеретін компаниялар: 

• «Қазақмыс» — ірі тау-кен компаниясы, көмірді, мыс және алтын кендерін өндірумен айналысады.
• «Шұбаркөл Көмір» — Қазақстандағы жетекші көмір өндірушілердің бірі, Қарағанды облысында орналасқан.
• «Евразия» — Павлодар облысында көмір өндірумен айналысатын компания.
• «Шығыс Көмір» — Шығыс Қазақстандағы көмірді өндіретін компания.
• «АрселорМиттал Теміртау» — ірі металлургиялық компания, Қарағанды облысында көмір өндірумен де айналысады.

Сонымен қатар, елдің әртүрлі аймақтарында көмір өндірумен айналысатын басқа да аймақтық және жеке компаниялар бар.

Еске сала кетсек, кеше ғана Тимур Құлыбаев «Шұбаркөл Премиум» компаниясындағы өз үлесінен бас тартқан болатын. Көмір өндірісінің тоқырауы басшыларына да әсер етсе керек. Компанияның 1 шілдедегі шығынына қарасақ, 6,3 млрд теңге болыпты. Осылай Құлыбаев өз орнын екі ірі кәсіпкер —  Кеңес Рақышев пен Шухрат Ибрагимовке табыстады. 

 Energyprom деректеріне зер салсақ, 2024 жылдың қаңтар-маусым айларында өткен жылмен салыстырғанда 99,3% төмендеді. Өндіріс көлемі 50,9 миллион тоннаға дейін 9,5% азайғанымен, импорт 34,1% өсіп, 529,1 мың тоннаға жетті.

Экспорт 6,9% қысқарып, 13,2 миллион тоннаны құрады, ал ішкі нарықтағы реализация 10% төмендеп, 38,2 миллион тонна болды.

Сондай-ақ, көмірдің бағасы 2024 жылдың тамыз айында жыл басынан бері 10,3% өсті. Өткен жылы бұл көрсеткіш 12,3% болды.