Қазақстанда кім көп жалақы алады?

 2024 жылдың шілде айында электронды еңбек биржасында 104,4 мың бос орын мен 132,4 мың түйіндеме орналастырылды. Онда жұмыс берушілер ең жоғары жалақы ұсынған мамандықтар тізімін жариялады. 

Бұл туралы Еңбек және халықты әлеуметтік қорғау министрлігі хабарлады. 

Еңбек және халықты әлеуметтік қорғау министрлігінің мәліметінше, жұмыс берушілер ұсынған ең жоғары жалақылар: 

• Бас құрылысшыларға – орташа есеппен айына 731 мың теңге;
• Бас агрономдарға - жуық шамамен 576 мың теңге); 
• Актуарийлерге - (532 мың теңгеден басталады).

Бұған қоса, жоғары жалақы сұраған мамандар бар. Мысалы, капитандар орташа есеппен 1,7 млн теңге, МРТ дәрігерлері 1 млн теңге және коммерциялық кәсіпорындардың IT бөлімшелерінің жетекшілері 992 мың теңге айлық талап етеді.

Өткен аймен салыстырғанда бос орындар саны 11%-ға артты, ал өзекті түйіндемелер саны 49%-ға өсті. Осы кезеңде орташа біліктілігі бар жұмысшыларға сұраныс артты.

Айрықша белсенділік білім беру, денсаулық сақтау және басқа қызмет көрсету салаларында байқалды.  Сұраныс пен ұсыныс құрылымында жұмысшылардың әртүрлі біліктілігі бойынша тепе-теңдік болғанымен, өткен аймен салыстырғанда орташа біліктілігі бар жұмысшыларға сұраныс 14%-ға өсті. Сонымен қатар, ұсыныстың қарқынды өсуіне жоғары біліктілігі бар үміткерлер әсер етті. Олардың түйіндемесі 41%-ға артты.

Өңірлер бойынша жұмыс берушілердің белсенділігі әртүрлі.

Төрт өңірде сұраныстың төмендегені байқалды:

• Жамбыл облысында – 43% (2,9 мың бос орын);
• Алматы облысында – 27% (1,6 мың бос орын);
• Маңғыстау облысында – 1% (20 бос орын);
• Шымкент қаласында – 9% (331 бос орын).

Ал сұраныстың өсуіне ең көп үлесін қосқан өңірлер – Қарағанды облысы (19%, яғни 1,9 мың бос орын), Алматы қаласы (15%, яғни 1,5 мың) және Павлодар облысы (14%, яғни 1,4 мың бос орын) болды.

Сұранысқа қарамастан, үміткерлер тарапынан ұсыныс барлық өңірде өсті. Ең үлкен белсенділік Шымкент қаласында (+167%, яғни 9,4 мың түйіндеме), Қызылорда облысында (+87%, яғни 4,3 мың түйіндеме) және Батыс Қазақстан облысында (+66%, яғни 2,5 мың түйіндеме) байқалды.

Оқу жылының басталуына байланысты білім беру және тәрбие саласындағы үміткерлердің белсенділігі айтарлықтай өсті – өткен аймен салыстырғанда жұмысқа ұсыныс екі есеге артты (+10,9 мың түйіндеме). Ең көп түйіндеме мына мегаполистерде орналастырылған: Астанада 2,5 мың түйіндеме, Алматыда 2,4 мың түйіндеме және Түркістан облысында 1,8 мың түйіндеме.

Шілде айында жұмыс берушілер арасында ең көп сұранысқа ие мамандар қатарында:

• Автомобиль жүргізушілері (2 мың бос орын, 2,3 мың түйіндеме);
• тәрбиешілер (1,9 мың бос орын, 2,1 мың түйіндеме);
• медбикелер (1,6 мың бос орын, 2 мың түйіндеме) болды. 

Сонымен қатар, тігіншілер, математика мұғалімдері және тәрбиеші көмекшілері сияқты мамандықтарға сұраныс едәуір артты.

2024 жылғы шілдеде электронды еңбек биржасында жұмыс берушілер мен үміткерлердің белсенділігі айтарлықтай өскені байқалды.