Қазақстанда кибершабуылдар көбейіп кетті

Мамандар Қазақстанның ақпараттық-коммуникациялық құрылымына, сондай-ақ байланыс операторларының желілеріне DDoS-шабуылдарының көбейгенін тіркеді, деп хабарлайды Orda.kz Мемлекеттік техникалық қызметке сілтеме жасап. 

МТҚ деректерді берудің магистральдық арналарына жүктеменің күрт өскені туралы хабарлады, бұл пайдаланушылардың жекелеген интернет-ресурстарға қол жеткізу жылдамдығына уақытша әсер етуі мүмкін.

«МТҚ мамандары байланыс операторларымен тығыз өзара іс-қимыл жасай отырып, маршруттарды қайта конфигурациялау және шабуыл салдарларын барынша азайту бойынша техникалық іс-шараларды жедел түрде жүргізіп жатыр. Алдын ала мәліметтер бойынша, кибершабуылдар прокси-серверлерді, бүркемелеу құралдарын және әртүрлі елдерде орналасқан таратылған бот-желілерді қолдану арқылы жүзеге асырылады. Бұл факторлар шабуыл көздерін нақты анықтауды айтарлықтай қиындатады», деп хабарлады МТҚ.

Қызмет ұлттық АКТ-инфрақұрылымының тұрақтылығы мен қауіпсіздігін қамтамасыз ету үшін барлық қажетті шараларды қабылдайды.

Өткен сенбі күні Қазақстан аумағында  «Орда» сайты бұғатталды. Сайт біздің елден басқа әлемнің кез келген жерінде қолжетімді болды. Бұғаттау дәл бір тәулік бойы, мамырдың үшінен 18.00-ден мамырдың төрті күнгі 18.00-ге дейін созылды.

2023 жылы уәкілетті орган бұйрығымен  «Қасақана жалған ақпарат таратқаны үшін» АҚШ Сауда министрлігінің Өнеркәсіп және қауіпсіздік бюросының сайты бұғатталды.

2024 жылы Қарағанды облысының прокурорлары есірткі заттарын насихаттайтын  7 мыңнан астам жарнамалық сайтты анықтап, бұғаттады.