Қазақстанда қазақ тілінің ұлттық корпусы құрылады

Елімізде қазақ тілінің ұлттық корпусы құрылады, деп хабарлайды Orda.kz. 

Депутаттар «Қазақстан Республикасының кейбір заңнамалық актілеріне мәдениет, білім беру және тәлімгерлік мәселелері бойынша өзгерістер мен толықтырулар енгізу туралы» заңды әзірлеген. Сенат осыған қатысты құжатты мақұлдады.

Бұл заңға сәйкес, қазақ тілінің сөздік қорына қолжетімділікті қамтамасыз ететін мемлекеттік ақпараттық жүйе құрылып, қазақ тілінің ұлттық сөздік қоры әзірленеді. Жүйеде қазақ тілінің барлық стильдері мен жанрларының мәтіндері қамтылады. Ал осы жүйенің ақпараттық-анықтамалығы ретінде қазақ тілінің ұлттық корпусын құру көзделген. Бұл шаралар негізінде қазақ тіліндегі мәтіндерді өңдеп, генерациялайтын, талдау жүргізетін жасанды нейрондық желіге негізделген қазақ тілінің сөздік қорын қолжетімді ететін ауқымды тіл моделі қалыптасады.

Сонымен бірге аталмыш заң шеңберінде, жетім балалар мен ата-анасының қамқорлығынсыз қалған балаларға арналған тәлімгерлік институтын реттеу үшін «тәлімгерлік жөніндегі ұйым» ұғымы енгізіледі. Ал тәлімгер болуға үміткер адамдар арнайы ұйымда тәлімгерлік бойынша оқудан өтіп, оларға құқықтық және психологиялық көмек көрсетіледі.