Қазақстанда Каспий теңізін зерттеу институты құрылады

Қазақстанда Каспий теңізін зерттейтін ғылыми-зерттеу институты құрылады.

Қаулы жобасын Су ресурстары және ирригация министрлігі дайындаған.

«Мемлекет басшысы алдын алу шараларын жүргізу үшін Маңғыстау облысында Каспийді зерттеумен айналысатын мемлекеттік ғылыми институт құруды тапсырды. Институттың құрылуы мәселені зерттеуге жан-жақты қарауға және ауқымды мәселелерді шешуге мүмкіндік береді» деп келтіреді Су ресурстары және ирригация министрі Нұржан Нұржігітов.

Жаңа ғылыми-зерттеу институтының екі негізгі бағыты болады: біріншісі – экологиялық. Бұл Каспий теңізінің экологиялық проблемаларына, атап айтқанда, деңгейінің төмендеуіне, итбалықтар мен балықтардың жаппай қырылуына, олардың популяциясын сақтап қалуға қатысты болады. Екінші бағыт – Каспий жағасындағы басқа мемлекет әріптестерімен өзара іс-қимылды қамтамасыз ету.

Министрліктің сайтында жарияланған жобаға сәйкес, институттың жарғылық капиталын мемлекет 100 пайыз қамтамасыз етеді. Бұл үшін бюджеттен 300 миллион теңге қарастырылуда.