Қазақстанда «еуропротокол» іске қосылды

2024 жылдың 1 қаңтарынан бастап еліміздегі көлік құралдарын міндетті сақтандыру бойынша сақтандыру төлеміне өтініш берудің жеңілдетілген тәртібі «еуропротокол» енгізілді, деп хабарлайды  Orda.kz ҚР Қаржы нарығын реттеу және дамыту агенттігіне сілтеме жасап.

Еуропалық хаттама бойынша сақтандыру талаптарын реттеу үшін жол-көлік оқиғасы арнайы талаптарға сай болуы керек:

- жазатайым оқиғада жарамды сақтандыру полисі бар 2 қатысушының болуы;

- 100 АЕК-ке дейінгі залал мөлшері;

- жол-көлік оқиғасына қатысушылардың кінәлі және жәбірленуші кім екендігі жөнінде келіспеушіліктерінің болмауы;

- үшінші тұлғалардың денсаулығы мен мүлкіне зиян келтірмеу.

Мекеменің  баспасөз қызметі пайдаланушыларға ыңғайлы болу үшін «Сақтандыру төлемдеріне кепілдік беру қоры» АҚ арнайы «Еуропротокол» мобильді қосымшасын әзірлегенін, оны App Store және Google Play дүкендерінен жүктеп алуға болатынын нақты айтты.