Қазақстанда Ауғанстанға көмек көрсететін БҰҰ өңірлік орталығы ашылады

Сенат Қазақстан үкіметі мен Біріккен Ұлттар Ұйымы арасындағы келісімді ратификациялау туралы заң жобасын мақұлдады, деп хабарлайды Orda.kz.

Құжатқа сәйкес, Қазақстанда Орталық Азия мен Ауғанстан үшін Тұрақты даму мақсаттары жөніндегі БҰҰ аймақтық орталығы ашылады.

Жаңа ұйым Қазақстан аумағында орналасады. Оның негізгі міндеті — тұрақты даму мақсаттарына жету бағытындағы аймақтық жұмыстарды үйлестіру, мемлекеттердің тәжірибе алмасуына және техникалық әрі сараптамалық қолдау алуына жәрдемдесу.

Бұл мекеме Орталық Азия мен Ауғанстан үшін маңызды саналатын климаттық тұрақтылық, экономикалық өсім, әлеуметтік саясат және гуманитарлық ынтымақтастық салаларындағы бірлескен бағдарламаларды жүзеге асырады.

Келісімде орталықтың құқықтық мәртебесі, елімізде орналасу және жұмыс істеу тәртібі, мемлекеттік органдармен өзара іс-қимылы, сондай-ақ БҰҰ қызметкерлерінің Қазақстанда болу шарттары бекітілген. Бұдан бөлек, құжат үкімет пен ұйым арасындағы қаржылық және ұйымдастырушылық мәселелерді реттейді.