Қазақстанда әскерге шақыру: SMS-хабарлама шақыру қағазын тапсырудың ресми әдісі ретінде танылады

Қазақстанда мерзімді әскери қызметке шақыру ережелері өзгереді, деп хабарлайды Orda.kz.

Қорғаныс министрлігі қаулы жобасын «Ашық НҚА» порталында жариялады - құжат 9 қыркүйекке дейін жария талқылауда болады.

Басты жаңалық - SMS-хабарламаларды шақыру қағазын тапсырудың ресми әдісі ретінде тану. Егер жоба қабылданса, әскерге шақырылушының нөміріне келген хабарлама – апарып қолына тапсырған қағаз хабарламаға теңестіріледі. Сонымен қатар, шақыру қағаздары eGov-тағы жеке кабинетке де жолданады. Электрондық хабарламалар әскери комиссариатқа келу күніне дейін кемінде үш күн бұрын жіберілуі тиіс.

Сондай-ақ, мемлекеттік органдарға жеке бармай-ақ, eGov порталы арқылы әскери қызметтен кейінге қалдыру мүмкіндігін беру ұсынылады.

Соңғы уақытта еліміздегі әскерге барғысы келмейтіндерге «шабуыл» күшейе түсті. Жастарды көшеде немесе емтихан кезінде «жүгендеп» алып кете береді. Осыған байланысты әскерден босатуға қатысты заң қызметтеріне сұраныс өсті. Кейбір компаниялар осындай қызметі үшін жүздеген мың теңге алып, кейіннен ақшамен қоса жоғалып кетіп жатқан оқиғалар көбейді.

Біз бұған дейін  Қорғаныс министрлігі әскерге баратындарды хабардар ету үшін SMS-хабарламаларды бекіту мәселесін қарастырып жатқаны туралы жазғанбыз. 

Сонымен қатар жастарды көшеден бірден «тізгіндеп алып» кетіп жатқан  видеолар тарағаннан кейін, Қазақстанның Қорғаныс министрлігі түсініктеме берді.

2025 жылы 42 098 қазақстандық әскерге шақырылады.