Қазақстанда 20 су қоймасы салынады

Үкіметте Су ресурстары және ирригация министрлігінің сумен қамтамасыз ету мәселелері және халықаралық келісімдер бойынша жұмысы қорытындыланды.

1 қыркүйекте Қазақстан Республикасының Президенті Қасым-Жомарт Тоқаев өз Жарлығымен Су ресурстары және ирригация министрлігін құрды.

Министрлік жұмысының жақында басталғанына қарамастан, нақты нәтижелер бар. Салаға қажетті нормативтік-құқықтық құжаттар әзірленіп, су ресурстары базасын ұлғайту бойынша жобалар жүзеге асырылуда, халықаралық ынтымақтастық дамып келеді.

Су ресурстарын басқару жүйесін дамытудың 2024–2030 жылдарға арналған тұжырымдамасы әзірленді. Бұл суармалы ауыл шаруашылығы алқаптарының көлемін 2,2 миллион гектарға дейін ұлғайтуға, су үнемдеу технологияларының үлесін 40 пайызға дейін арттыруға, суармалы суды жеткізу кезіндегі ысыраптарын 15 пайызға дейін төмендетуге мүмкіндік береді.

Қазақстан Республикасы су шаруашылығын дамытудың 2024–2030 жылдарға арналған кешенді жоспары әзірленді. Оны жүзеге асыру еліміздің су ресурстарының көлемін 3,7 текше шақырымға арттыруға, суармалы су ысыраптарын азайтуға және оның көлемін 3 текше шақырымға арттыруға, 55 мыңнан астам халқы бар 41 елді мекенді сумен қамтамасыз етуге, сондай-ақ Қазақстанға көршілес елдерден су жеткізу бойынша тәуелділікті 25%-ға  азайтуға мүмкіндік береді.

2024-2026 жылдары республика бойынша 20 жаңа су қоймасының құрылысын бастау және 15 су қоймасын қайта жаңғырту жоспарлануда. Суару жүйелерінің тозуы мәселелерін шешу үшін ұзындығы 3,5 мың шақырым болатын 339 канал қайта жаңғыртылады.

Ұлттық гидрогеологиялық қызметі құрылуда. Ол жер асты суларының мониторингін және талдауын, іздестіру және барлау жұмыстарын ұйымдастырады және жүргізеді, сондай-ақ гидрогеологиялық ұңғымаларды жою және консервациялаумен айналысады.