Қазақстан Венгрияға экспорт көлемін арттыруға дайын

Қазақстан мен Мажарстан арасындағы экспорт мәселелі Нью-Йоркте өтіп жатқан БҰҰ Бас ассамблеясының 78-сессиясы аясында көтерілді.

Онда Сыртқы істер министрлігінің басшысы Мұрат Нұртілеу мен Венгрияның Сыртқы экономикалық байланыстар және сыртқы істер министрі Петер Сийяртоның кездесуі өтті.

«Қазақстан Еуропалық Одақтағы жақын әрі сенімді стратегиялық серіктес  Венгриямен берік байланыстарымызды жоғары бағалайды. Біздің экономикалық ынтымақтастығымыз айтарлықтай өсуде және біз экспортты шамамен 700 миллион доллар болатын 95 тауар позициясына арттыруға дайынбыз»,- деді Нұртілеу.

Сонымен қатар, тараптар саяси, сауда-экономикалық және мәдени-гуманитарлық ынтымақтастықтың қазіргі жағдайы мен болашағын талқылады.

Сондай-ақ министрлер алдағы  жоғары деңгейдегі сапарлар,  Астана мен Будапешт арасындағы стратегиялық әріптестік пен өзара тиімді ынтымақтастық қатынастарын нығайтуға қосымша серпін беретінін атап өтті.

Қазақстан Республикасы Сыртқы істер министрлігінің басшысы «Stipendium Hungaricum» стипендиялық бағдарламасының жалғасуына тоқталды. Оның аясында Мажарстан тарапы қазақстандық студенттерге Венгрияның жетекші университеттерінде білім алу үшін жыл сайын 250 білім грантын бөледі.

Сыртқы істер ведомстволарының басшылары жаһандық және өңірлік күн тәртібіндегі өзекті мәселелер, сондай-ақ көпжақты платформалар аясындағы өзара іс-қимыл мәселелері бойынша пікір алмасты.