Қазақстан төлқұжаты бар Вагнер жалдамалысы АҚШ-қа заңсыз өтпек болған

АҚШ-Мексика шекарасында Қазақстан азаматтымын деген ер адам ұсталды. Ол АҚШ-қа заңсыз кірмек болған. Америкалық прокурорлар оның ресейлік Вагнер тобында қызмет еткенін анықтады, деп хабарлайды Orda.kz. 

The Times of Central Asia басылымының жазуынша, қаңтардың 4-і күні Техас штатында Тимур Пірәлиев есімді азамат шекараны заңсыз кесіп өтпек болған жерінде ұсталған. Пірәлиев Ресей-Украина әскери қақтығыстарына Ресей жағынан қатысқан атышулы Вагнер тобында қызмет еткенін айтты. 5 қаңтарда оның үстінен қылмыстық іс қозғалды.

«Ұсталған азамат азаматтығы туралы сұраққа өзінің Қазақстан азаматы әрі тұрғыны екенін айтты. Ол 2025 жылдың 4 қаңтарында Техас штатының Рома қаласы маңындағы Рио-Гранде өзенінен өтіп, Америка Құрама Штаттарына заңсыз кірген», деп мәлімдеді сот. 

Америкалық БАҚ-тың хабарлауынша, қамауға алу кезінде Пірәлиевтің Ресей және Қазақстан (Қазақстан заңдары қос азаматтыққа тыйым салады) азаматы ретінде екі төлқұжаты бар екені анықталды. Бұрынғы жалдамалының қалтасында жеті мың доллар (ақшаның бір бөлігі Мексика песосы түрінде) және жолдорбасында бірге алып жүретін ұшу құрылғысы (беспилотник) болған.

Прокуратура жолы болмаған мигрантты 15 тәулікке қамауға алуды талап етті. Пірәлиевтің өзі кінәсін мойындап, оған неғұрлым жеңіл жаза тағайындалды.  Ол талап арыз бойынша шешімді күтіп, көші-қон түрмесінде болған уақытында қамауға алу жазасы өтелді. Америкалық БАҚ-тың хабарлауынша, ұсталған адам депортацияланғанға дейін де қамауда болады.

АҚШ-тың заңсыз иммигрантты  Ресейге немесе Қазақстанға депортациялайтыны белгісіз.