«Қазақстан» телерадио кешенін қалпына келтіруге қанша млрд теңге жұмсалды?

2022 жылы Қаңтар оқиғасы кезінде Республика алаңындағы «Қазақстан» медиаорталығының ғимараты өртке оранды. Оны толық қалпына келтіру жұмыстары 2025 жылдың желтоқсанына дейін аяқталады деп жоспарланып отыр, деп хабарлайды Orda.kz.

Қалпына келтіру жұмыстары аяқталайын деп қалды. Алматы қаласы әкімдігінің хабарлауынша, бүгінгі таңда құрылыс жұмыстарының 60 %-ы аяқталған.

«Құрылысты қаржыландырудың 93,3 %-ы қала бюджеті есебінен (22,2 млрд теңге) жүзеге асырылып жатыр. Жұмыстарды 2025 жылдың желтоқсанында аяқтау жоспарланған», — деп жазылған мегаполис әкімі Ерболат Досаевтың сәуір айының қорытындысы бойынша Президентке ұсынған есебінде.

20 миллиард теңгеге жаңартылған РТРК ғимаратында телестудиялар, дыбыс павильондары, монтаж залдары және іскерлік шараларға арналған кеңселер болады. Қаланың құрылыс басқармасы осылай уәде беріп отыр.

«Техникалық жарақтандыру телевизиялық және кинематографиялық контентті халықаралық деңгейде жасауға, сондай-ақ цифрлық форматтарды дамытуға мүмкіндік береді. Бұл – әлемдік стандарттарға сай заманауи, технологиялық медиаорталық болады», — деп мәлімдеді ведомство.

Телерадио кешенінің ескі ғимараты Алматы әкімдігі сияқты Қаңтар оқиғасы кезінде өртелген еді. Ол кезде ғимарат ішінде бірнеше қызметкер болған. Қылмыскерлер оларды ұрып-соғып, сейфтерді ашып, барлық құрал-жабдықтарды алып кеткен.

Студия толықтай жанып кетті. Шабуыл сәті еліміздегі қаңтар трагедиясы туралы деректі фильм-хроникаға енді.

«Қазақстан» РТРК АҚ – 1958 жылы эфирге шыққан алғашқы ұлттық телеарна. 2022 жылғы оқиғалардан кейін Алматы әкімдігінің ғимаратын да қайта қалпына келтіруге тура келді. Оған 17 млрд теңге жұмсалды.